សហគមន៍​គ្រីស្ទបរិស័ទគណៈនិកាយប្រូតេស្តង់កម្ពុជា​ (ស.គ.ប.ក​)បានដឹកនាំគ្រូគង្វាលដែលជាសមាជិកចូលរួមទីវាជាតិអន្តរសាសនាប្រឆាំងការជួញដូរមនុស្ស​ ២០​ សីហា​ ២០២៥​ ក្រោមវត្តមានដ៏ខ្ពង់ខ្ពស់​ ឯកឧត្តមអភិសន្ដិបណ្ឌិត ស សុខា

August 27, 2025 By Admin

សហគមន៍​គ្រីស្ទបរិស័ទគណៈនិកាយប្រូតេស្តង់កម្ពុជា​ (ស.គ.ប.ក​)បានដឹកនាំគ្រូគង្វាលដែលជាសមាជិកចូលរួមទីវាជាតិអន្តរសាសនាប្រឆាំងការជួញដូរមនុស្ស​ ២០​ សីហា​ ២០២៥​ ក្រោមវត្តមានដ៏ខ្ពង់ខ្ពស់​ ឯកឧត្តមអភិសន្ដិបណ្ឌិត ស សុខា ៖ រាជរដ្ឋាភិបាល នីតិកាលទី៧ បន្តប្តេជ្ញាចិត្តប្រយុទ្ធប្រឆាំងដាច់ខាតអំពើជួញដូរមនុស្ស និងបទល្មើសឧក្រិដ្ឋដទៃទៀត។

ភ្នំពេញ ៖ ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស គ.ជ.ប.ជ មានប្រសាសន៍ថា រាជរដ្ឋាភិបាល នីតិកាលទី៧ បន្តប្តេជ្ញាចិត្តប្រយុទ្ធប្រឆាំងដាច់ខាតអំពើជួញដូរមនុស្សគ្រប់ទម្រង់ និងបទល្មើសឧក្រិដ្ឋដទៃទៀត ដែលជាឧបសគ្គរារាំង ដល់ដំណើរការអភិវឌ្ឍជាតិគ្រប់វិស័យ។

ការលើកឡើងរបស់ ឯកឧត្តមអភិសន្ដិបណ្ឌិត ស សុខា នាឱកាសអញ្ជើញជាតំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុងទិវាជាតិអន្តរសាសនាប្រឆាំងអំពើជួញដូរមនុស្ស លើកទី៩ ឆ្នាំ២០២៥ ក្រោមប្រធានបទ «សុខដុមនីយកម្ម សាសនា នៅកម្ពុជា ជាសក្តានុពលក្នុងការប្រឆាំង អំពើជួញដូរមនុស្ សគ្រប់ទម្រង់ នាសម័យបច្ចេកវិទ្យា» នៅមជ្ឈមណ្ឌល សន្និបាត និងពិព័រណ៍អន្តរជាតិជ្រោយចង្វារ នារសៀលថ្ងៃទី២០ ខែសីហា ឆ្នាំ២០២៥។

ឯកឧត្តមអភិសន្ដិបណ្ឌិត ស សុខា បានគូសបញ្ជាក់ថា «រាជរដ្ឋាភិបាល នីតិកាលទី៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាននឹងកំពុងបន្តវេន ដឹកនាំប្រទេសជាតិ យ៉ាងស្វាហាប់ឆ្ពោះទៅកាន់ ចក្ខុវិស័យកម្ពុជា ឆ្នាំ ២០៥០ តាមយុទ្ធសាស្ត្របញ្ចកោណ ដំណាក់កាលទី១ និងបន្តប្តេជ្ញាចិត្ត ប្រយុទ្ធប្រឆាំងដាច់ខាតអំពើជួញដូរមនុស្សគ្រប់ទម្រង់ និងបទល្មើសឧក្រិដ្ឋដទៃទៀត ដែលជាឧបសគ្គរារាំង ដល់ ដំណើរការអភិវឌ្ឍជាតិគ្រប់វិស័យ»។

ទន្ទឹមនឹងនេះ ក្នុងនាមសម្ដេចធិបតី ហ៊ុន ម៉ាណែត ឯកឧត្តមអភិសន្ដិបណ្ឌិត ស សុខា បានកោតសរសើរ និងវាយតម្លៃខ្ពស់ ប្រកបដោយមោទនភាព ចំពោះភាពសុខដុមរមនា នៃគ្រប់ជំនឿសាសនានៅកម្ពុជា ដែលតែងតែរួមរស់ជាមួយគ្នាដោយសុខសាន្ត មានសាមគ្គីភាព និងកិច្ចសហការ ល្អគាំទ្រគ្នាទៅវិញទៅមកដោយភាពទន់ភ្លន់ មិនមានទំនាស់ មិនប្រទូស្តរ៉ាយគ្នា និងមិនដែលបង្កឱ្យមានការបែកបាក់ ក្នុងសង្គមជាតិឡើយ។

ឯកឧត្តមអភិសន្ដិបណ្ឌិត ស សុខា បន្ដថា មិនតែប៉ុណ្ណោះ សាសនាទាំងឡាយនៅកម្ពុជា បានឯកភាពរួមគ្នាដោះស្រាយបញ្ហាប្រឈម ទាំងឡាយ ក្នុងសង្គម រួមទាំងអំពើជួញដូរមនុស្ស តាមរយៈការបង្ការទប់ស្កាត់ដោយការអប់រំបែបសីលធម៌៕

រាជធនីភ្នំពេញ​ ថ្ងៃពុធ​ ១១រោច​ ខែស្រាពណ៍​ ឆ្នាំម្សាញ់​ សប្តស័ក​ ព.ស​ ២៥៦៩​ ត្រូវ​នៅ​ងថ្ងៃទី២០​ ខែសីហា​ ឆ្នាំ២០២៥